မေမေဈေးကိုရောက်ရင်လေ

မေမေ ဈေးသွားတော့မလို့လား…။

            အတော်ပဲ မေမေရယ်။ ကျွန်တော် ပစ္စည်းလေးနည်းနည်းမှာလိုက်ချင်လို့။ ၀ယ်လာခဲ့ပေးနော်။

            မေမေ ဈေးကိုရောက်ရင်လေ ကျွန်တော့်အတွက် ‘စိတ်လျှော်ဆပ်ပြာမှုန့်’ တစ်ထုပ်လောက်ဝယ်လာခဲ့ပေးပါ။ ကျွန်တော့်မှာ မလျှော်မဖွပ်ဘဲ ခြင်းထဲမှာပဲစုပုံထားရလို့ ညစ်ထေးနေတဲ့စိတ်တွေ တောင်လိုပုံနေပြီ။ အနံ့အသက်ကလည်း ညှင်းသိုးသိုးနဲ့။ အဲဒါကြောင့် ကျွန်တော့်အတွက် စိတ်လျှော်ဆပ်ပြာမှုန့် ကောင်းကောင်းမွှေးမွှေး တစ်ထုပ်လောက် ၀ယ်လာ ခဲ့ပါနော်။ ဈေးပေါတာတွေလည်း မ၀ယ်လာခဲ့နဲ့နော်။ အဲဒါတွေနဲ့လျှော်လိုက်ရင် ကျွန်တော့်စိတ်တွေရိဆွေးပြီး ခဏလေးနဲ့ စုတ်ပြဲထွက်ကုန်လိမ့်မယ်။

            ပြီးတော့ ကျွန်တော့်မှာ စိတ်သစ်ဆပ်ပြာကုန်နေလို့ ‘စိတ်သစ်ဆပ်ပြာဗူး’ တစ်ဗူးလည်း ၀ယ်ခဲ့ပါအုံးမေမေရယ်။ မနက်အိပ်ရာထ စိတ်သစ်ဆပ်ပြာလေးနဲ့ သစ်လိုက်ရမှ တစ်ညလုံးအိပ်ပုပ်ကြီးထားတဲ့စိတ်တွေ လန်းဆန်းကြည်လင် လာတာမေမေရဲ့။ ညအိပ်ရာဝင်ခါနီးရင်လည်း စိတ်သစ်ဆပ်ပြာလေးနဲ့ သစ်လိုက်မှဘဲ တစ်နေကုန်စွန်းပေနေတဲ့ အညစ် အကြေးတွေ ကျွတ်ထွက်ကုန်ပြီး သန့်ရှင်းတောက်ပြောင်သွားတော့တယ်။ အဲဒီစိတ်သစ်ဆပ်ပြာနဲ့ မသစ်ဘဲထားရင် ကျွန်တော့်ရဲ့စိတ်တွေမှာ အဖုအပိမ့်တွေ ထွက်လာလိမ့်မယ်။ အဲဒါကြောင့် ကျွန်တော့်အတွက် စိတ်သစ်ဆပ်ပြာဗူးလေး တစ်ဗူးလောက် ၀ယ်ခဲ့ပေးနော်။

            ပြီးတော့ရှိသေးတယ် မေမေရဲ့။ ဈေးရောက်လို့ရှိရင် ကျွန်တော့်အတွက် ‘စိတ်တိုက်တံ’ အသစ်စက်စက် တစ်ချောင်းလောက် ရှာပြီးဝယ်ခဲ့ပေးပါအုံး။ ကျွန်တော့်ရဲ့ စိတ်တိုက်တံအဟောင်းလေးက မနက်တစ်ခါ၊ နေ့လည်တစ်ခါ၊ ညတစ်ခါနဲ့ တစ်နေ့သုံးခေါက်လောက်တိုက်နေရတော့ အနားစတွေဖွာလန်ကြဲပြီး ကျွတ်ထွက်ကုန်ပြီ။ အဲဒီလို ခဏခဏ မတိုက်ပေးပြန်ရင် စိတ်အကြွင်းအကျန်တွေ စုပုံလာပြီး စိတ်ပုပ်စော်နံလာလိမ့်မယ် မေမေရဲ့။ ဒါကြောင့် စိတ်တိုက်တံ ကောင်းကောင်းလေး တစ်ချောင်းလောက် ရှာပြီးဝယ်ခဲ့ပါနော်။ အရောင်ကတော့ အဖြူရောင်လေးပဲ ၀ယ်ခဲ့ပါမေမေ။ ပြီးတော့ ‘စိတ်တိုက်ဆေးဗူး’ တစ်ဗူးပါ တစ်လက်စတည်း ၀ယ်ထားလိုက်ရင်ကောင်းမယ်။ ကျွန်တော့် စိတ်တိုက်ဆေးဗူး လည်း ကုန်ခါနီးနေပြီ။ မေမေ… ဒီတစ်ခါဝယ်ရင် စိတ်တိုက်ဆေးဗူး ‘အကြီး’ ၀ယ်ခဲ့နော်။ ဗူးသေးက အသုံးမခံဘူး မေမေရဲ့။ စိတ်တွေက တိုက်ရချွတ်ရလွန်းတော့ ခဏလေးနဲ့ကုန်ကုန်သွားတယ်။ ပြီးတော့ ၀ယ်တဲ့အခါမှာလည်း သေသေချာချာ ရွေးပြီးဝယ်ခဲ့နော်။ စိတ်တိုက် ဆေးဗူးတွေက နှစ်ရောင်ခြယ်စိတ်လှဆေးတို့၊ သုံးရောင်ခြယ်စိတ်လှဆေးတို့ ဆိုပြီး အမျိုးစုံအောင်ရှိတယ် မေမေရဲ့။ ကြိုက်တာသာဝယ်လာခဲ့ပါ မေမေရယ်။ အရေးကြီးတာက စိတ်တွေခိုင်မာပြီး ဖြူစင် တောက်ပြောင်လာဖို့ပါပဲ။

            မှာစရာတွေက ကျန်သေးတယ် မေမေရဲ့။ ကျွန်တော့်စိတ်တွေကို မရိတ်မသင်ဘဲ ဒီအတိုင်း ထားထားတော့ ကျိုးတို့ကျဲတဲ ထိုးထိုးထောင်ထောင်နဲ့ ကြည့်လို့မကောင်းဘူး ဖြစ်နေတယ်။ အဲဒါ ကျွန်တော်အတွက် ‘စိတ်ရိတ်ဓါး’ လေးတစ်ချောင်းလောက်လည်း လမ်းကြုံရင်ဝယ်လာခဲ့ပေးပါအုံး။ အဲဒါမှ ဟိုတစ်စ သည်တစ်စဖြစ်နေတဲ့ စိတ်တွေကို ရှင်းလို့ရမှာ။

            အခုတလော ညညဆိုရင် လျှပ်စစ်မီးတွေက မကြာခဏပျက်ပျက်နေတတ်တယ် မေမေ။ အဲဒါကြောင့် မီး ရုတ်တရက်ပျက်သွားရင် အရေးပေါ်ထွန်းရအောင် ‘စိတ်လင်းဓါတ်မီး’ လေးတစ်လုံးလောက်လည်း ၀ယ်ပြီးဆောင်ထားရင် ကောင်းမယ်နော်။ တော်တော်ကြာ မီးပျက်သွားတဲ့အခါ ဘာမှမမြင်ရဘဲ စိတ်မှောင်မှောင်ကြီးထဲမှာ ငုတ်တုတ်ထိုင် နေရလိမ့်မယ်။ စိတ်လင်းဓါတ်မီးလေးထွန်းထားတော့ အဆင်ပြေတာပေါ့ မေမေရယ်။ ဓါတ်ခဲနဲ့ဟာ မ၀ယ်ခဲ့နဲ့နော်။ လျှပ်စစ်နဲ့အားပြန်သွင်းလို့ရတဲ့ စိတ်လင်းဓါတ်မီးပဲ ၀ယ်ခဲ့ပါမေမေ။

            ပြီးတော့ ကျွန်တော်က ထမင်းစားပြီးရင် တခါတလေစိတ်ကြားညှပ်တတ်တော့ ‘စိတ်ကြားထိုးတံ’ လေးတွေလည်း ၀ယ်လာပေးပါအုံး။ အများကြီးမဟုတ်ပါဘူး မေမေ။ လေးငါးချောင်းလောက်ဆို ရပါတယ်။ ထမင်းစားပြီးတိုင်း ခိုးလိုးခုလုနဲ့ စိတ်ကြားညှပ်နေရင် ကျွန်တော်မနေတတ်ဘူးမေမေရဲ့။ ဒါကြောင့် စိတ်ကြားညှပ်နေတဲ့အခါ စိတ်ကြားထိုးတံလေးနဲ့ ကလော်ထုတ်၊ ထိုးထုတ်လိုက်မှ နေသာထိုင်သာရှိသွားမှာ။ ပြီးတော့ ကျွန်တော့်အခန်းထဲမှာ စိတ်အမှိုက်တွေက ဗြုတ်စဗျင်းတောင်းနဲ့ ပြန့်ကျဲရှုပ်ပွနေတာပဲ မေမေရာ။ ဖွတဲ့သူကတော့ တစ်ခြားလူမဟုတ်ပါဘူး။ ကျွန်တော်ကိုယ်တိုင်ပါပဲ မေမေရာ။ အဲဒါ ကျွန်တော့်အခန်းထဲက စိတ်အမှိုက်အစအနတွေ ထည့်ထားဖို့အတွက် ‘စိတ်အမှိုက်ပုံး’ လေးတစ်ပုံး လောက် လုပ်ထားရင်ကောင်းမယ်ထင်တယ်နော်။

            ဒါနဲ့မေမေ။ ဈေးရောက်ရင် ဆေးဆိုင်တွေဘက်ရော ရောက်အုံးမလား။ ရောက်ဖြစ်ရင် ကျွန်တော့်အတွက် စိတ်ကိုက်ပျောက်ဆေးတစ်ကဒ်ရယ်၊ စိတ်အစာကြေဆေးတစ်ကဒ်ရယ် ၀ယ်လာခဲ့ပေးပါ။ စိတ်ကိုက်ပြီး စိတ်မကြည်မလင် ဖြစ်နေရင် စာကြည့်ပျက်မှာစိုးလို့ပါ မေမေ။ စာမေးပွဲကလည်း ဖြေရဖို့နီးလာပြီဆိုတော့လေ။ မေမေ… ပိုက်ဆံလောက် သေးရင် ဆေးဆိုင်ရောက်လက်စနဲ့ စိတ်အားဆေးဗူးတစ်ဗူးလောက်လည်း ၀ယ်ခဲ့ပါလား။ တစ်မိသားစုလုံး သောက်လို့ ရမယ့် စိတ်အားဆေးဗူးမျိုးပေါ့။ ဈေးသိပ်ကြီးရင်တော့လည်း မ၀ယ်ပါနဲ့တော့မေမေရယ်။ ဒါမသောက်လို့လည်း ဘာမှဖြစ် မသွားပါဘူး။

            ဒါပေမယ့် မေမေရေ။ ဈေးရောက်ရင် မ၀ယ်မဖြစ်ဝယ်ရမယ့် ပစ္စည်းတစ်ခုရှိတယ်။ ဘာလဲ ဆိုတော့ ‘စိတ်ထောင်ချောက်’ လေ။ ညညကျ လူခြေတိတ်ချိန်ဆိုရင် ဟိုနားကတကျွိကျွိ၊ ဒီနားကတကျွိကျွိနဲ့ စိတ်တွေက အရမ်း သောင်းကျန်းနေတာ အိပ်လို့တောင်မရဘူး။ တခါတလေ စိတ်တွေက တစ်ကောင်နဲ့တစ်ကောင် နပန်းလုံးနေလိုက်တာ ဆူညံပွက်လောကိုရိုက်နေတာပဲ။ သူတို့ကိုယ်သူတို့ ‘ဂျွန်စီနာ’ တို့၊ ‘အန်ဒါတေကာ’ တို့များ မှတ်နေသလားမသိဘူး။ အဲဒါ ဒင်းတို့ကိုဖမ်းဖို့အတွက် စိတ်ထောင်ချောက်လေး တစ်ခုလောက်။ အင်း…နှစ်ခုလောက်မှ အဆင်ပြေမယ်ထင်တယ် မေမေ။ ဒါမှ သူတို့ တစ်ဆွေလုံး တစ်မျိုးလုံးဖမ်းမိမှာ။ ‘စိတ်သတ်ဆေး’ တို့၊ ‘စိတ်ဖမ်းကော်’ တို့ကျတော့ အဆင်မပြေဘူးမေမေ။ စိတ်သတ်ဆေးစားပြီးရင် သူတို့ကသေချင်တဲ့နေရာမှာသေနေတော့ အနံ့ထွက်လာမှလိုက်ရှာရတာ စိတ်ညစ်စရာ ကောင်းတယ်။ စိတ်ဖမ်းကော်ကျတော့လည်း သူတို့ကို ကလော်ထုတ်ရတာ အသည်းယားဖို့ကောင်းတယ် မေမေရဲ့။ စိတ်ထောင်ချောက်ကောင်းကောင်းသာ ၀ယ်လာခဲ့ပါမေမေရယ်။

            နေဦး…နေဦး ကျန်သေးတယ် မေမေရဲ့။ ညဆိုရင် စိတ်တွေက တ၀ီဝီနဲ့ အရမ်းကိုက်တာပဲ။ ကျွန်တော့် တစ်ကိုယ်လုံးလည်း စိတ်ကိုက်ထားလို့ အဖုတွေအပိမ့်တွေနဲ့ ယားယံနေတာပဲ။ အဲဒါကြောင့် ‘စိတ်နိုင်ဆေးခွေ’ ကောင်းကောင်းလေး တစ်ဗူးလောက်ဝယ်ခဲ့ပါအုံး။ ဗျာ…စိတ်နိုင် ဆေးခွေထွန်းရင် မီးခိုးတွေမွှန်ပြီး စိတ်တွေ အသက်ရှူကျပ် လိမ့်မယ်။ ပြီးတော့ မတော်တဆ စိတ်တွေထ ‘လောင်’ မှာလည်း ကြောက်ရသေးတယ်။ ဟုတ်တာပေါ့မေမေ။ အဲဒါကို ကျွန်တော် မစဉ်းစားလိုက်မိဘူး။ ဒါဆို စိတ်မကိုက်တဲ့ လိမ်းဆေးလေး ၀ယ်ခဲ့ပါလား မေမေ။ အင်း…ဒါပေမယ့် အဲဒါက လိမ်းထားတုန်း ခဏပဲနေလို့ရတာ။ ဆေးအရှိန်ပြယ်သွားရင် ပြန်ကိုက်တာပဲ။ ခဏခဏလိမ်းဖို့ကလည်း အဆင်မပြေပါဘူး မေမေရယ်။ ကဲ…အဲဒါဆိုလည်း အားလုံးအဆင်ပြေသွားအောင် ‘မိသားစုစိတ်ခြင်ထောင်ကြီးကြီး’ တစ်လုံးသာ ၀ယ်လာ ခဲ့ပါတော့ မေမေရာ။ ကိစ္စပြတ်ကရော။

            သြော်…မေ့တော့မလို့။ ‘မမကြီး’ က မှာခိုင်းထားတာ ရှိသေးတယ်။ ‘စိတ်ပေါင်းအိုး’ တဲ့။ ဘာစိတ်ကူးပေါက်တာ လည်း မသိပါဘူး။ တစ်သက်လုံး စိတ်ကိုအရည်ငှဲ့ပြီး ချက်လာတဲ့ဥစ္စာ။ ခုကျမှ စိတ်ပေါင်းအိုးနဲ့ချက်ချင်လို့တဲ့။ သူပြောတာ ကတော့ စိတ်ကိုအရည်ငှဲ့ပြီးချက်ရင် ငှဲ့လိုက်တဲ့အရည်ထဲမှာ အာဟာရဓါတ်တွေပါကုန်ပြီး လိုအပ်တဲ့ စိတ်အာဟာရဓါတ် တွေမရတော့ဘူးတဲ့။ ဒါကြောင့် အာဟာရဓါတ်တွေ မဆုံးရှုံးအောင် စိတ်ပေါင်းအိုးနဲ့ချက်ချင်လို့တဲ့။ ပြီးတော့ စိတ်ပေါင်းအိုးနဲ့ ချက်ရင် အချိန်ကုန်လည်းသက်သာ၊ အလုပ်ရှုပ်လည်းသက်သာတယ်တဲ့။ သူက မနက်စောစော ရုံးသွားရတော့ ကမန်းကတန်းနဲ့ချက်ရင် စိတ်တွေက မနူးမနပ်နဲ့ ပျော့တဲ့အခါပျော့၊ မာတဲ့အခါမာ ဖြစ်ကုန်မှာစိုးတဲ့။ သူပြောတာလည်း ဟုတ်တော့ဟုတ်သားပဲ မေမေရယ်။ စိတ်ပေါင်းအိုးလေးတစ်လုံးလောက်တော့ ၀ယ်ခဲ့ပေးလိုက်ပါနော်။

            မေမေ…မမကြီးအတွက် ‘စိတ်ပူအိုး’ ကောင်းကောင်း တစ်လုံးလောက်လည်း ၀ယ်လာခဲ့ပေးပါအုံးနော်။ အိမ်မှာ ရှိတဲ့စိတ်ပူအိုးက သိပ်မကောင်းတော့ဘူးထင်တယ်။ ဘယ်လောက်တိုက်တိုက် စိတ်တွေက စန့်စန့်ပြန့်ပြန့် မဖြစ်တော့ဘူး။ အတွန့်အကြေတွေ များနေတယ်။ စိတ်အတွန့်အကြေကြီးတွေ ၀တ်ပြီးတော့ လူကြားထဲသွားရမှာ ရှက်စရာကြီး မေမေရယ်။ ဒါကြောင့် စိတ်တွေကို စန့်ပြန့်နေအောင်တိုက်ဖို့အတွက် စိတ်ပူအိုးတစ်လုံးလည်း ၀ယ်ခဲ့ဖို့ မမေ့နဲ့နော်။

            ပြီးတော့ ‘မမလတ်’ ကလည်း မှာထားတာရှိတယ်။ သူ့စိတ်တွေက ဖရိုဖရဲနဲ့ ရှုပ်ပွနေတတ်လို့ သူ့အတွက် ‘စိတ်စည်းကြိုး’ လေးတွေ ၀ယ်လာခဲ့ပေးပါတဲ့။ ဟုတ်တယ် မေမေရဲ့။ သူကစိတ်တွေကို အရှည်ထားတော့ စိတ်စည်းကြိုး လေးနဲ့မှ မစည်းထားရင် စိတ်တွေရှုပ်ပွနေတတ်တာ။ စိတ်တွေကို ဖြီးသင်ဖို့ပြောတော့လည်း စိတ်တွေကျွတ်ထွက် လွန်းလို့တဲ့။ မဖြီးဘဲထားထားတယ်။ စိတ်တွေကို အတိုညှပ်ဖို့ကျပြန်တော့လည်း သူအချိန်အကြာကြီး အရှည်ထားထားတဲ့ စိတ်တွေကို နှမြောလို့တဲ့။ အင်း…သူ့အတွက် စိတ်စည်းကြိုး လှလှလေးတွေသာ ၀ယ်လာခဲ့လိုက်ပါ မေမေရာ။

            မေမေရေ…မေမေ့ ချစ်သမီးအငယ်ဆုံးလေးက ပြောခိုင်းထားတာလည်း ရှိသေးတယ်။ သူကတော့ ပစ္စည်းမှာတာ မဟုတ်ပါဘူး။ သူက ‘စိတ်အလှပြင်ဖိုး’ တောင်းခိုင်းထားတာ။ ဘာလုပ်ဖို့လဲဆိုတော့ စိတ်အလှပြင်ဆိုင်မှာ စိတ်အဖြောင့် ဆွဲချင်လို့တဲ့။ ဟိုတလောတုန်းကပဲ စိတ်ကိုသွားပြီး ‘ကောက်’ လာသေးတယ်။ အခု ပြန်ဖြောင့်ချင်ပြန်ပြီတဲ့လေ။ မေမေ့ သားသမီးတွေထဲမှာ သူကစိတ်ကိုကစားဆုံးပဲ။ တော်တော်ကြာ စိတ်ပေါင်းတင်လိုက်၊ တော်တော်ကြာ စိတ်အရောင် ဆိုးလိုက်၊ တော်တော်ကြာ စိတ်ကိုညှပ်လိုက်၊ တော်တော်ကြာ ပြန်ဆက်လိုက်နဲ့။ အလုပ်ကို ရှုပ်နေတာပဲ။ သူကတော့ သူ့ကိုယ်သူ ‘စိတ်အလှဆင်တဲ့သူ’ တဲ့လေ။ သူ့ဟာနဲ့ သူကတော့ ဟုတ်နေတာပဲ။

            ဒါပေမယ့် မေမေ။ ညီမလေးက သူ့ကိုယ်သူ စိတ်အလှဆင်တဲ့သူလို့သာ ကြွေးကြော်နေတာ။ သူ့ရဲ့စိတ် လှလား မလှဘူးလားဆိုတာကို ကြည့်လို့မရဘူး ဖြစ်နေတယ်။ အကြောင်းရင်းကတော့ သူ့ရဲ့ တစ်ခုတည်းသော ‘စိတ်ကြည့်မှန်’ လေး ကျွန်တော့်ကြောင့် ကျကွဲသွားလို့ပါပဲ မေမေရယ်။ ဒါကြောင့် ညီမလေး စိတ်လှမလှ ကြည့်နိုင် သိနိုင်ဖို့အတွက် စိတ်ကြည့်မှန်လေး တစ်ချပ်လောက်လည်း ၀ယ်လာခဲ့ပါ မေမေ။

            အင်း…ဖေဖေကလည်း မှာထားတာတွေ ရှိသေးတယ် မေမေရဲ့။ ‘စိတ်ညှပ်ပေါင်မုန့်’ စားချင်တယ်တဲ့။ ညနေခင်း လက်ဖက်ရည်ချိန်ကျရင် လက်ဖက်ရည်သောက်ရင်းနဲ့ စားဖို့အတွက်တဲ့။ အိမ်မှာရှိတဲ့ စိတ်အူချောင်းကြော်တွေကလည်း စားရတာရိုးသွားပြီတဲ့။ ဒါကြောင့် အပြောင်းအလဲလေးဖြစ်အောင် စိတ်ညှပ်ပေါင်မုန့်လေး စားချင်လို့တဲ့။ ပြီးတော့ အဲဒီ စိတ်ညှပ်ပေါင်မုန့်နဲ့ တို့စားဖို့အတွက် ‘စိတ်အချဉ်ရည်ဗူး’ ပါ တစ်ခါတည်း ၀ယ်လာခဲ့ပါအုံးတဲ့။ အရမ်းကြီးစပ်တဲ့ စိတ် အချဉ်ရည်ဗူးမျိုး မဟုတ်ဘူးတဲ့။ ချဉ်ငန်စပ် အရသာလေးဆိုရင် ရပြီတဲ့။ ဖေဖေကလည်း အစားအသောက် တော်တော် ဂျီး(ကြေး) များတာပဲနော်။

အဲ…ကျန်သေးတယ် မေမေရဲ့။ ဟို…ဈေးထဲမှာ ‘စိတ်ရိုး’ ကလေးတွေ တွေ့ရင်လည်း ၀ယ်လာခဲ့ပါအုံးတဲ့။ စိတ်ရိုးစွပ်ပြုတ် မသောက်ရတာ ကြာပြီတဲ့။ အဲဒါသောက်ချင်လို့ စိတ်ရိုးကလေးတွေတွေ့ရင် ဘယ်လောက်ပေးရပေးရ ၀ယ်လာခဲ့ပါတဲ့။ ဟုတ်တယ် မေမေ။ ကျွန်တော်လည်း သောက်ချင်တယ်။ တွေ့ရင်တော့ ၀ယ်ခဲ့ပေးပါ မေမေရယ်။ အိမ်မှာ ‘စိတ်ရယ်ဒီမိတ်ဗူး’ တွေချည်း ချက်စားနေရတာ ကြာတော့လည်း ငြီးငွေ့လာပြီ။ မစားချင်တော့ဘူး။

စားစရာ သောက်စရာ အကြောင်းပြောမှ သတိရတယ် မေမေ။ မီးဖိုချောင်ထဲမှာရှိတဲ့ ‘စိတ်ဓါး’ တွေလည်း တုံး ကုန်ပြီမေမေ။ ချက်ဖို့ ပြုတ်ဖို့အတွက် စိတ်တွေကို ခုတ်ထစ်တဲ့အခါ တော်ရုံနဲ့ မပြတ်ဘဲ တို့လို့တွဲလောင်းတွေဖြစ်ဖြစ်နေလို့ နှစ်ခါ၊ သုံးခါလောက် ပြန်ပြန်ခုတ်နေရတယ်။ အဲဒီ စိတ်ဓါး တွေကိုသွေးဖို့ ‘စိတ်သွေးကျောက်’ တစ်တုံးတော့ လိုလာပြီ မေမေ။ ဒါမှမဟုတ် စိတ်ဓါးအသစ်တွေ ၀ယ်လာလည်းရတာပါပဲ။ အဆင်ပြေသလိုသာ ကြည့်ဝယ်ခဲ့လိုက်ပါနော်။

အင်း…မှာရင်း မှာရင်းနဲ့ ၀ယ်စရာပစ္စည်းတွေလည်း တော်တော်များသွားပြီ မေမေရယ်။ ဒါတွေက မ၀ယ်ထား လို့ကလည်း မဖြစ်ပြန်ဘူးလေ။ ‘စိတ်’ ဆိုတာကလည်း ပြောတော့သာ ဘာမှမဟုတ်ဘူးလို့ထင်ရတာ။ စိတ်ကို ပိုင်ဆိုင် လာပြီးတဲ့နောက်တော့ အဲဒီစိတ်ကိုဖြူစင်အောင် လျှော်ရဖွပ်ရ၊ ပြောင်လက်အောင် တိုက်ရချွတ်ရ၊ သပ်သပ်ရပ်ရပ် ဖြစ်အောင် အပူပေးရ၊ အလှပြင်ရ၊ မလိုတာတွေဖယ်ထုတ်ရ၊ လိုတာတွေသိမ်းထားရနဲ့ တော်တော်လေးကို အလုပ်ရှုပ် တာပဲနော်။ မပြုမပြင် အလှမဆင်ဘဲ ထားလိုက်ပြန်ရင်လည်း အဲဒီစိတ်တွေက ပုပ်သိုးသွားတတ်ပြန်ရော။ ဒါကြောင့် စိတ်ကလေးတွေ သူ့နေရာနဲ့သူ အထားအသို မှန်နေဖို့အတွက် စီစဉ်နေရတာ။ စိတ်အတိုင်း ‘ကျ’ ဖို့က တော်တော်တော့ မလွယ်ဘူးနော်…မေမေ။

အဲဒါတွေကြောင့်ပေါ့ မေမေရယ်…။

မေမေဈေးကိုရောက်ရင်လေ ကျွန်တော်တို့မှာလိုက်တဲ့ ပစ္စည်းတွေကိုဖြစ်နိုင်ရင် အကုန်လုံးပါအောင် ၀ယ်လာခဲ့ ပေးပါလို့။

နော်…မေမေ။       ။

လင်းဇင်ယော်

IDEA Magazine (June, 2011)