ငယ်ငယ်တုန်းက
ရွှေသွေးထဲမှာ ဖတ်ဖူးတာလေးပါ။
ကာတွန်းဆရာနာမည်တော့
မမှတ်မိတော့ပါဘူး။ ဇာတ်ကောင်က ကိုချစ်ပေါ။
ကိုချစ်ပေါက
ဓနိတောရွာသား။ ကိုချစ်ပေါက ငါးရောင်းတယ်။
တစ်နေ့မှာ
လူတစ်ယောက်က ကိုချစ်ပေါကို ရောင်းအားတက်အောင်ဆိုပြီး အကြံတစ်ခုပေးခဲ့တယ်။
ကြော်ငြာဆိုင်းဘုတ်ထောင်ဖို့။
ဘယ်လိုရေးရမလဲလို့ ကိုချစ်ပေါကမေးတော့
ဓနိတောချစ်ပေါ
ဒီနေရာမှာ ငါးရောင်းသည် လို့ရေးတဲ့။ ပြောပြီးထွက်သွားတယ်။
ကျန်ရစ်ခဲ့တဲ့
ကိုချစ်ပေါကလည်း ရောင်းအားကောင်းချင်တော့ သူပြောတဲ့အတိုင်း
အိမ်ရှေ့မှာ
ဆိုင်းဘုတ်ထောင်လိုက်တယ်။
ဓနိတောချစ်ပေါ
ဒီနေရာမှာ ငါးရောင်းသည်။
သုံးရက်လောက်ကြာတော့
လူတစ်ယောက် ရောက်လာတယ်။ စောစောက လူတစ်ယောက်မဟုတ်ဘူး။
နောက်ထပ်လူတစ်ယောက်။
အဲဒီ လူတစ်ယောက်က ကိုချစ်ပေါကို မေးတယ်။
ဓနိတောချစ်ပေါအပြင်
အခြားချစ်ပေါတွေ ရှိသေးလို့လားတဲ့။ ကိုချစ်ပေါ ပြန်ဖြေတယ်။
ဒီတစ်ကြောမှာ
ချစ်ပေါတစ်ယောက်ပဲရှိတယ်။ ချစ်ပေါဆိုရင် ဓနိတောကမှန်း အားလုံးသိ။
ဒါဆို
ဓနိတောနေစရာမလိုဘူးတဲ့။ ဖြုတ်လိုက်တဲ့။ အဲဒီလူက ပြောပြီးထွက်သွားတယ်။
ကျန်ရစ်ခဲ့တဲ့
ကိုချစ်ပေါက ဒါလည်းဟုတ်တာပဲဆိုပြီး ဆိုင်းဘုတ်ကို ပြန်ပြင်လိုက်တယ်။
ချစ်ပေါ
ဒီနေရာမှာ ငါးရောင်းသည်။
သုံးရက်လောက်ကြာတော့
လူတစ်ယောက် ရောက်လာပြန်တယ်။ စောစောက လူတစ်ယောက်တွေ မဟုတ်ဘူး။
အသစ်
လူတစ်ယောက်။ အဲဒီ လူတစ်ယောက်က ကိုချစ်ပေါကို မေးပြန်တယ်။
ကိုချစ်ပေါ
ဒီနေရာအပြင် အခြားနေရာတွေမှာရော ငါးရောင်းသေးလို့လားတဲ့။ ကိုချစ်ပေါ ပြန်ဖြေတယ်။
ချစ်ပေါ
ဒီတစ်နေရာတည်းပဲ ငါးရောင်းတယ်။ ဒီနေရာမှာ ချစ်ပေါ ငါးရောင်းတာ အားလုံးသိ။
ဒါဆိုလည်း
ဒီနေရာမှာနေစရာ မလိုဘူးတဲ့။ ဖြုတ်လိုက်တဲ့။ စောစောက လူတစ်ယောက်တွေ
မဟုတ်တဲ့
အသစ်လူတစ်ယောက်က ပြောပြီးထွက်သွားပြန်တယ်။
ကျန်ရစ်ခဲ့တဲ့
ကိုချစ်ပေါက ဒါလည်းဟုတ်တာပဲဆိုပြီး ဆိုင်းဘုတ်ကို ပြန်ပြင်ပြန်တယ်။
ချစ်ပေါ
ငါးရောင်းသည်။
သုံးရက်လောက်ကြာတော့
လူတစ်ယောက် ရောက်လာပြန်တယ်။ တစ်ခါမှ မလာဖူးတဲ့ လူတစ်ယောက်။
အဲဒီ
လူတစ်ယောက်က ကိုချစ်ပေါကို မေးပြန်တယ်။
ကိုချစ်ပေါ
ငါးအပြင် ပုစွန်တွေ၊ ကြက်သားဝက်သားတွေရော ရောင်းသေးလို့လားတဲ့။ ကိုချစ်ပေါ ပြန်ဖြေတယ်။
ချစ်ပေါ
ငါးတစ်မျိုးတည်းပဲရောင်းတယ်။ ချစ်ပေါ ငါးမျိုးစုံရောင်းတယ်။ ချစ်ပေါ ငါးရောင်းတာ အားလုံးသိ။
ဒါဆိုလည်း
ငါးနေစရာမလိုဘူးတဲ့။ ဖြုတ်လိုက်တဲ့။ တစ်ခါမှ မလာဖူးတဲ့ လူတစ်ယောက်က
ပြောပြီးထွက်သွားပြန်တယ်။
ကျန်ရစ်ခဲ့တဲ့
ကိုချစ်ပေါက ဒါလည်းဟုတ်တာပဲဆိုပြီး ဆိုင်းဘုတ်ကို ပြန်ပြင်ပြန်တယ်။
ချစ်ပေါ
ရောင်းသည်။
သုံးရက်လောက်ကြာတော့
လူတစ်ယောက် ရောက်လာပြန်တယ်။ ဓနိတောမှာ လူတစ်ယောက်တွေက
အင်မတန်များတယ်။
အဲဒီ လူတစ်ယောက်က ကိုချစ်ပေါကို မေးပြန်တယ်။
ကိုချစ်ပေါအပြင်
ဒီမှာ အခြားဘယ်သူတွေက ရောင်းသေးလို့လဲတဲ့။ ကိုချစ်ပေါ ပြန်ဖြေတယ်။
ချစ်ပေါတစ်ယောက်ပဲ
ရောင်းတယ်။ ချစ်ပေါ သမာအာဇီဝနဲ့ရောင်းတာ အားလုံးသိ။
ဒါဆိုလည်း
ချစ်ပေါနေစရာမလိုဘူးတဲ့။ ဖြုတ်လိုက်တဲ့။ ဓနိတောရဲ့ လူတစ်ယောက်က
ပြောပြီးထွက်သွားပြန်တယ်။
ကျန်ရစ်ခဲ့တဲ့
ကိုချစ်ပေါက ဒါလည်းဟုတ်တာပဲဆိုပြီး ဆိုင်းဘုတ်ကို ပြန်ပြင်ပြန်တယ်။
ရောင်းသည်။
သုံးရက်လောက်ကြာတော့
လူတစ်ယောက် ရောက်လာပြန်တယ်။ အထက်ဖော်ပြပါ လူတစ်ယောက်များ
မဟုတ်တဲ့
လုံးဝအသစ်စက်စက် လူတစ်ယောက်။ အဲဒီ အသစ်စက်စက်လူတစ်ယောက်က
ကိုချစ်ပေါကို
မေးပြန်တယ်။
ကိုချစ်ပေါ
ရောင်းတာအပြင် ဝယ်တာတို့ ပေါင်တာတို့ ချေးတာတို့ ငှားတာတို့ လုပ်သေးလို့လားတဲ့။
ကိုချစ်ပေါ
ပြန်ဖြေတယ်။
ချစ်ပေါ
ရောင်းပဲရောင်းတတ်တယ်။ ချစ်ပေါ ကောင်းရောင်းကောင်းဝယ်လုပ်စားနေတာ အားလုံးသိ။
ဒါဆိုလည်း
ရောင်းသည်နေစရာ မလိုဘူးတဲ့။ ဖြုတ်လိုက်တဲ့။ လုံးဝအသစ်စက်စက် လူတစ်ယောက်က
ပြောပြီးထွက်သွားပြန်တယ်။
ကျန်ရစ်ခဲ့တဲ့
ကိုချစ်ပေါက ဒါလည်းဟုတ်တာပဲဆိုပြီး…။
ဓနိတောမှာ
ကိုချစ်ပေါ အခုချိန်ထိ ငါးရောင်းနေတုန်းပဲ။
လင်းဇင်ယော်
၂၀၁၃၊
ဇူလိုင်။
