အသံလွန်လှိုင်းနဲ့လှမ်းထောက်ကြည့်တော့။
ခင်ဗျားကိုယ်ထဲ စပျစ်သီးတွေပြွတ်သိပ်။ အချိန်မဟုတ်။
အခါမဟုတ်။
ခင်ဗျားကိုယ်ထဲက စပျစ်သီးတွေဟာ ခင်ဗျားချဉ်ခဲ့တဲ့စပျစ်သီးတွေလား။
ခင်ဗျားမမြင်ခဲ့တဲ့စပျစ်သီးတွေလား။ ခင်ဗျားချိုခဲ့တာလား။
ခင်ဗျားမြိုခဲ့တာလား။
ဝါးပင်မှာ။ ရွှေဖရုံသီးမှာ။ ရွှေငါးကြီးဗိုက်ထဲမှာ။
လူသားသန္ဓေတည်သလို။
ခင်ဗျားကိုယ်ထဲ စပျစ်သီးသန္ဓေ။
ခင်ဗျားသွေးကြောထဲမှာ (Zuma Game) ထဲကလို ရောင်စုံစပျစ်သီးတွေတန်းစီရွေ့လျား။
ခင်ဗျားအူလမ်းကြောင်းထဲမှာ ခင်ဗျားမြိုခဲ့တဲ့စပျစ်သီးတွေ
တစ်လုံးနဲ့တစ်လုံးတွန်းတိုက်။
ခင်ဗျားအဆုတ်နှစ်ဖက်လုံး စပျစ်နွယ်တွေစင်ထိုး။
စပျစ်တွေ ရာသီမရွေး။
ခင်ဗျားဦးနှောက်ထဲ စပျစ်မှိုစွဲ။ စပျစ်ပိုးထိုး။
ခင်ဗျားရိုးတွင်းချဉ်ဆီမှာ စပျစ်(အချင်းချင်း)ယိုထိုး။
ခင်ဗျားနှလုံးအခန်းလေးခန်းထဲ စပျစ်သီးတွေကျင်းဝင်စိမ်။
ခင်ဗျားအသည်းမှာ စပျစ်ဝိုင်ချိုမြမြ။ လျှံကျ။
ခင်ဗျားမှုတ်ထုတ်လိုက်တဲ့သက်ပြင်းထဲ စပျစ်ရနံ့တွေ
ဖွားခနဲ။ ဖွားခနဲ။
ခင်ဗျားဟာ စပျစ်သီးတွေကိုယ်ဝန်ဆောင်ထားသူ။
မည်းမှောင်နေတဲ့လောကထဲ။
ခင်ဗျား ပထမဆုံးမွေးထုတ်လိုက်တဲ့စပျစ်သီးက
နေလုံးဖြစ်သွား။ စပျစ်နေပူပူအောက်။
ပင်လယ်ရေခန်းခြောက်။ ကုန်းမြေတွေပေါ်ပေါက်လာ။
ကျွန်းတန်းတွေပေါ်လာ။
ခင်ဗျားမကျေမနပ်နဲ့ နောက်တစ်ကြိမ်မွေးထုတ်လိုက်တဲ့
ဒုတိယမြောက်စပျစ်သီးက လဖြစ်သွား။
နောက်ထပ်ဆက်တိုက် မွေးထုတ်လိုက်တဲ့စပျစ်သီးတွေ။
ကြယ်မှုန်ကြယ်မွှား။ လွင့်စင်။
ရှိသမျှကုန်းမြေ တစ်လက်မမှမကျန်အောင် စပျစ်ခြံတွေသိမ်းပိုက်။
နှစ်ချို့စပျစ်ဝိုင်တွေ။
ချက်လုပ်။
စပျစ်ဝိုင်မူးတော့ ခင်ဗျားသွေးဆိုး။
တွေ့သမျှ မြင်သမျှ စပျစ်သီးအကုန် ခင်ဗျားတွင်းနက်ကြီးထဲ
ကောက်ထည့်။ ကြီးကြီး။ ငယ်ငယ်။ ချဉ်ချဉ်။ ချိုချို။
ပိုးထိုးထိုး။ မှိုစွဲစွဲ။ ကောက်ထည့်။
ကမ္ဘာဟာ ခင်ဗျားချဉ်ခဲ့တဲ့ စပျစ်သီးတစ်လုံး။
ခင်ဗျားဟာ စပျစ်သီးတစ္ဆေ။ ကိုယ်စပျစ်ရိုင်း
ကိုယ်ပြန်မထိန်းချုပ်နိုင်တဲ့
စပျစ်သီးတစ္ဆေ။ ကိုယ့်စပျစ်ကိုယ်ပတ်။ ကိုယ်မွေးတဲ့စပျစ်
ကိုယ့်ပြန်ခြောက်။
ခင်ဗျားရဲ့စပျစ်ရိုင်းတွေ ခုတ်လေပွားလေ။ ရှင်းလေပွားလေ။
ခင်ဗျားရဲ့စပျစ်သီးတွေ။
ခင်ဗျားခန္ဓာကိုယ်ထဲ ကင်ဆာဆဲလ်တွေလိုပြန့်နှံ့။
အဲဒီစပျစ်သီးတွေကပဲ ခင်ဗျားကိုဝမ်းသာအားရ လိုက်ပါပို့ဆောင်။
နှုတ်ဆက်။
စပျစ်ရွက်ခြောက်တွေနဲ့ဖုံးလွှမ်းထားတဲ့ ခင်ဗျားမြေပုံမှာ။
စပျစ်နွယ်တွေလိမ်ယှက်ရှုပ်ထွေး။
ခင်ဗျားနာမည်နဲ့ စပျစ်သီးတစ်လုံး။ ဒီနေ့ဒီအချိန်အထိ။
ဘယ်သူမှရှာမတွေ့သေး။
၂၀၁၃၊ ဇန်နဝါရီ။
