ကဗျာတစ်ပုဒ် သင်္ဘောတစ်စင်းပေါ်ကနေခုန်ချထွက်ပြေးလာတယ်
ကဗျာတစ်ပုဒ် ကျောပိုးအိတ်တစ်လုံးလွယ်လျက် စည်ပိုင်းပြတ်တစ်ခုကိုဖက်တွယ်လျက်
သတိလစ်မေ့မြော
လျက် ပင်လယ်ထဲမျောနေတယ် ကဗျာတစ်ပုဒ်ကို သင်္ဘောတစ်စင်းကပြန်လည်တွေ့ရှိသွားတယ်
ကဗျာတစ်ပုဒ်ကို သင်္ဘောပေါ်ဝိုင်းဆယ်တင် ကြိုးနဲ့တုပ် ထမင်းကျွေး လက်သီးနဲ့ထိုး ရေတိုက်
ခြေထောက်နဲ့ဆောင့်ကန်
ကဗျာတစ်ပုဒ်ကို အုန်းပင်မှာဇောက်ထိုးဆွဲထားတယ်
အစာရေစာဖြတ်ထားတယ်
ကဗျာတစ်ပုဒ်ဟာ ဘာသာစကားမျိုးစုံအသုံးပြုပြီး
အသံကုန်အော်ဟစ်နေတယ်
ကဗျာတစ်ပုဒ်ရဲ့အော်ဟစ်သံကို ဘယ်သူမှမကြားဘူး
နားမထောင်ဘူး
ကဗျာတစ်ပုဒ်ဟာ ချွေးဒီးဒီးကျလာတယ် အမြှုပ်တစီစီထွက်လာတယ်
ကဗျာတစ်ပုဒ် ဇောက်ထိုးသတိလစ်သွားတယ်
ကဗျာတစ်ပုဒ် အရေးပေါ်ဌာနကိုရောက်လာတယ်
သတိ
မရတစ်ချက်။ ရတစ်ချက်။
မရတစ်ချက်။ ရတစ်ချက်။
မရတစ်ချက်။ ရတစ်ချက်။
နဲ့
ကဗျာတစ်ပုဒ်ဆုံးသွားတယ်
လည်ပင်းမှာကြိုးရာတွေနဲ့ လက်ကောက်ဝတ်မှာကြိုးရာတွေနဲ့
ခြေချင်းဝတ်မှာကြိုးရာတွေနဲ့
ကဗျာတစ်ပုဒ်ဆုံးသွားတယ်
မျက်နှာမှာဖူးရောင်ဒဏ်ရာတွေနဲ့ ကဗျာတစ်ပုဒ်ဆုံးသွားတယ်
နောက်ကျောမှာထိုးသွင်းဒဏ်ရာတွေနဲ့ ကဗျာတစ်ပုဒ်ဆုံးသွားတယ်
နံရိုးတွေကျိုးကြေပြီး ကဗျာတစ်ပုဒ်ဆုံးသွားတယ်
ဦးနှောက်သွေးယိုပြီး ကဗျာတစ်ပုဒ်ဆုံးသွားတယ်
ကဗျာတစ်ပုဒ် အသက်ဆက်မရှူနိုင်တော့ဘူး ကဗျာတစ်ပုဒ်
နှလုံးဆက်မခုန်နိုင်တော့ဘူး
လူတွေကလက်တို့ပြီးပြောနေကြတယ် ကဗျာတစ်ပုဒ်ရေနစ်သေတဲ့အကြောင်း
၂၀၁၂၊ နိုဝင်ဘာ။
No comments:
Post a Comment